बुटवल, १६ फाल्गुन – विद्यार्थी जीवनका मीठा पलहरू, मायालुसँग बिताएका अविस्मरणीय क्षणहरू र लोकदोहोरीको मिठास बोकेको गीत ‘झलिझली छ’ सार्वजनिक भएको छ। यस गीतमा उदाउँदा मोडल कृष्णबाबु भण्डारी र स्मारिका ढकालको अभिनय रहेको छ।
गुल्मी धुर्कोट गाउँपालिका-५, बस्तु मा जन्मिएका भण्डारीले यसअघि ‘म रोएको कस्ले देख्छ र’ जस्ता चर्चित गीतमा पनि अभिनय गरिसकेका छन्। औषधि व्यवसायमा सफल रहँदै, नेपाली लोकसंस्कृति र लोकदोहोरीलाई प्रवर्द्धन गर्ने उद्देश्यले उनले मोडलिङ क्षेत्रमा सक्रियता बढाएका हुन्।
गीतका शब्द युवराज डुम्रेको हुन्, जसमा वर्षौंदेखि डायरीका पानामा सीमित भावना संगीतमार्फत प्रस्तुत गरिएको छ। गीतले विद्यार्थी जीवनका रमाइला क्षणहरू, प्रेमका नजिकिएर टाढिएका पलहरू र स्मृतिहरूलाई कलात्मक रूपमा चित्रण गरेको छ।
गीतमा लोकप्रिय गायक कमल बीसी ‘माइल दाइ’ र चर्चित गायिका मेलिना राईको सुमधुर स्वर सुन्न सकिन्छ। कृष्णबाबु भण्डारी र स्मारिका ढकालको उत्कृष्ट अभिनयले गीतलाई थप जीवन्त बनाएको छ।
यो गीत स्मिता स्नेहा इन्टरटेन्मेन्टको युट्युब च्यानल मार्फत सार्वजनिक गरिएको छ, जहाँ दर्शकहरूले सुन्न र हेर्न सक्नेछन्।
गीत हेर्नुहोस्: झलिझली छ